現年29歲的J2《不正常愛情研究所》前主持文頌男（Koba），於去年10月確診患上「尤文氏肉瘤」，屬罕見病症。Koba之後全面停工和積極接受治療，並於去年底曾公開透露：「有一個6×6×4cm 咁大嘅惡性腫瘤喺我嘅椎間近盤骨附近嘅位置，因為壓住咗啲神經，所以行動唔方便同週（按：周）不時會劇痛。」
一直積極抗癌的Koba，除早前已完成5次化療，亦共要接受28次電療療程，上月底表示已完成25次。然而，Koba病情反覆，於本月17日在社交平台發表稱需要再次入院，並寫道：「其實由五日前開始都好唔舒服，一開始係好似有啲感冒嘅感覺，又會不停標冷汗，右上背無緣無故肌肉痛，條頸好似瞓捩頸咁，痛感一直扯到上去右邊頭部後尾枕，搞到持續頭痛。全身又有小小發軟、用唔到力，尋日仲發現食晚餐嘅時候咀嚼都冇力，舌頭右邊都好似用唔到力。右上背試過貼唔同嘅鎮痛藥膏、做按摩，但係都冇用，持續五日都係咁痛，啲痛楚搞到我咩姿勢都好唔舒服，瞓喺度又唔係，企喺度又唔係，坐喺度又唔係，瞓覺都好難瞓到。試過攞個頭撞卷廚房紙，好似好少少。最後真係頂唔順，叫咗救護車入醫院」。
至21日再度發文，並表示：「我出咗院喇……入咗公立醫院住院呢五日，簡直係惡夢。」Koba形容留醫期間感覺有如「坐監」，「痛到叫救命嘅時候，其實係唔會有人即時幫到你。我叫護士嚟，基本上佢哋係幫唔到我，最多都係開啲止痛藥畀我。仲要當我要求攞藥嘅時候，佢哋會同我講：『等多半個鐘啦，一陣佢哋會派藥。』我當時心諗：『你試下你劇痛嘅時候，搵到一個唯一應該能夠幫到你嘅人，然後佢叫你等多半個鐘，我仲要劇痛多一排，你諗下你係咩感受？仲要食完藥之後，我起碼要等多個半鐘之後啲藥先開始發揮作用。』」Koba指，幸好有帶平時服用的止痛藥入院，「再瑟縮咗個半鐘先開始慢慢好啲」。
Koba又提到，留院期間曾打算到樓下散步惟被拒絕，於是哀求負責護士終獲答應讓他散步15分鐘，可是後來卻被保安送返病房，讓他感覺「好似坐監咁，淨係可以喺間房入面瞓。其實我都係想等對腳可以活動下啫，唔使好似坐監咁呀嘛」。
Koba明白公立醫院人手不足，但這次經歷都令他明白到不少人說過的「有錢就有得醫，冇錢就等死囉」，並指「我第一次聽到呢啲說話嘅時候，我係已經劇痛到瞓喺病床度覆診緊，而當時我係再一次畀個醫生拖我症，我嚴重到咁嘅時候，佢仲同我講，叫我兩三個禮拜先後再返嚟覆診再睇吓，我當時係已經覺得自己冇可能撐到多過兩日，然後我聽到呢句說話嘅時候，嗰啲眼淚係不自覺流出嚟，完全停唔到」。
他最後稱：「喺公立醫院嘅經歷充滿挑戰同痛苦，但呢啲經歷令我對自身有更深刻嘅反思同領悟，我明白到即使環境艱難、有好多不公嘅事情發生喺我身上，但我選擇保持樂觀同積極面對生活。雖然喺公立醫院住院係好唔愉快嘅經歷，但我唔會埋怨公立醫院，亦都感謝每一位醫護人員嘅付出。我希望公立醫院可以有改善得好嘅一日，令普通市民都可以得到最快捷最適切嘅治療。」
Text：Fion圖片來源（部分）：文頌男（Koba）IG
延伸閱讀
