上次提過BB 過肥過瘦都唔健康, 但如果BB真係太輕, 追唔上生長線, 點算好呢?少少分享, 家中妹妹是龍鳳胎, 由懷孕起已經知道唔夠阿哥爭營養, 體重過輕, 頭圍亦過小, 醫生擔心影響腦部發育, 決定一到九個月就剖腹生產.一出世, 哥哥體重正常, 妹妹則過輕, 只得1.98kg, 即4.3磅. 我只看了她一眼, 就送了入NICU (嬰兒加護病房), 一住就住了一個月.
這段時間, 我只能做個勤力泵媽, 全家大小事務分工合作. 要相信自己的媽媽奶, 但亦要放手拜託身邊所有親友分擔家中大小事 (當然我好幸運有好的家人).雖然埋身餵哺是最理想的方法, 但有時BB啜好耐, 當媽咪是奶嘴, 對BB增加體重幫助不大.
埋身餵哺的媽媽, 不妨試試以下的 “Triple Feeding Plan”*
1) 埋身餵 – 每邊約10-15分鐘, 兩邊總共不超過20-30分鐘
2) 補奶 – 當然最好是母乳, 可以樽或小杯餵, 直至BB飽了不再飲
3) 泵奶 – 就算是埋身餵, 泵奶都好重要. 一方面可以泵清, 讓身體加快造奶; 另一方面亦可以留番儲備待下一餐BB的 “小點”.
埋身餵, 補奶, 泵奶, 儘量於一小時內完成
但如有其他原因未能埋身, 則最好每次記錄低BB飲奶量. 每個BB 飲奶量略有不同, 不過一般建議每公斤, 每天喝280-300毫升的奶**.例如一個3kg 的BB, 每天就需飲840-900ml 的奶, 如每天飲7次奶, 即每次120ml (4安) 至 128ml (4.3安)奶. 而由過輕B追番變成正常體重B, 則需要比正常飲奶量再多50%.不過始終, 每個B 的健康, 體質, 和生長速度各有不同, 千萬不要同其他B比較, 自己BB健康快樂成長已經好好.
*Inadequate Weight Gain or Failure to Thrive in a Breastfed Infant, LLLGB Conference Handout, 2011**Failure to Thrive, Scott D. Krugman, M.D. & Howard Dubowitz, M.D., 2003
延伸閱讀
