很多打工仔在長期糧尾的情況下，食個「頹飯」是常識吧。要食頹飯已經慘慘豬，以為揀個少醬或者蒸飯就可以健康D，食頹飯都可以有追求，自我感覺無咁頹。如果你真係咁諗，就可能隨時中伏，只有更頹！營養師李龍家麒話，一名成年人每餐只可以攝取10克脂肪，約2匙油 。但問題係，大部分香港最常見中式碟頭飯脂肪量都爆錶。更大件事係，表面上蒸飯好健康，其實係肥到不行！Text/Anne
時菜肉片飯VS冬菇蒸雞飯中伏位：雞皮冬菇蒸雞飯雖然沒有用油爆炒，烹調方法的確比時菜肉片飯健康，但脂肪量卻更高! 問題出在雞皮，蒸煮時雞油更會滲入飯中，即使食時去皮，仍無濟於事。相反，時菜肉片飯嘅豬肉片脂肪較低，加上肉同飯分開煮，油份相對更少。
豉油雞飯VS 蒸鯇魚飯中伏位：魚腩、滾油蒸鯇魚可以是健康，但亦可以係肥霸。分別在於： 1. 食邊個位－鯇魚腩夠滑啖啖肉，但脂肪較高，魚尾或魚背就比教健康。2. 汁料－淋滾油，條魚係會滑D，但同時又會肥唔止DD，甚至比燒味更肥！反觀豉油雞飯，含油量比蒸鯇魚更少，如果去皮少汁走薑蓉，就更健康。
沙爹牛肉飯VS豉汁鳳爪排骨蒸飯中伏位：鳳爪、排骨見到沙爹牛肉飯，就覺得邪惡？少年，你太年青了！其實豉汁鳳爪排骨蒸飯更肥！問題在於鳳爪的雞皮有大量油脂，排骨更是一隻豬脂肪含量最高嘅部位之一！沙爹醬雖然都唔係瘦，但勝在炒牛肉相對健康。只要盡量少吃芡汁，仍然贏蒸飯！
叉燒飯VS魷魚蒸肉餅飯中伏位：肉餅、魷魚有邊款飯比叉燒飯更肥？就係呢個「雙料」飯！李龍家麒提醒大家，出街食飯最好少食蒸肉餅，因為好多時肉餅之所以好味，係加咗三分之一、甚至一半肥肉，脂肪自然爆燈。另外，雖然魷魚脂肪唔高，但有大量膽固醇。如果平時已經鍾意食肥膩食物，或是膽固醇高人士，則可免則免。合指一算，都係叫叉燒飯安全，但一定要叫瘦叉！
對於經常要出外用餐，營養師李龍家麒有以下建議：1. 湯飯如冬瓜肉粒湯飯和肉片節瓜湯飯，一般較健康，但要飲少兩啖湯，以免攝取過多鈉，導致血壓上升。2. 本土特色燒味，點可以唔食？只記緊要瘦叉燒、雞要去皮，勿加薑蓉。3. 有芡汁飯可照食，如榨菜肉片飯、番茄牛肉飯等，但要少吃芡汁。4. 醬油含大量鈉質，少吃為妙，以免令血壓升高，加重腎的負擔，導致水腫。5. 擴闊飲食範圍，如選擇壽司、清湯海鮮火鍋、泰式柚子沙律等。
延伸閱讀
