希臘式／希臘乳酪瘋魔全球，究竟有咩咁特別？咪就係蛋白質特別高，所以質地會幼滑啲稠身啲，仲會飽肚啲！
不過如果你揀得唔啱，分分鐘揀咗隻高脂肪低蛋白質嘅乳酪，仲要畀多左錢添！等我幫大家搵市面上嘅品牌嚟解釋一下啦！
同普通乳酪相比，希臘乳酪／希臘式乳酪會用多啲奶，所以蛋白質通常會高大約一倍；一分錢一分貨，一般都會貴啲。
暫時係香港就無法例去規定定義。但英國就規定只有喺希臘生產嘅先可以叫希臘乳酪（但有一隻Maple Hill Creamery 係美國製造又叫做希臘乳酪窩）。而係其他國家或有類似口感質地嘅乳酪，就叫希臘式乳酪。
其實傳統式嘅希臘乳酪係用全脂奶、忌廉同益生菌製造，所以相比起一般乳酪，蛋白質較高，但脂肪亦都較高。除非你特登選擇註明係低脂嘅希臘乳酪，咁就比較健康！（例子：Fage 0%）
而市面上有部份嘅希臘式乳酪，喺脫脂奶裏面再加入牛奶固體，所以蛋白質成分同希臘乳酪差唔多，而且仲要係低脂，比較適合關注心臟健康同控制體重嘅朋友。（例子：Emmi 0%）
不過要小心，有啲希臘式乳酪只係加咗增稠劑（e.g. Pectin）而蛋白質並唔高。又或者使用全脂奶製造，脂肪高得嚟蛋白質又唔高。（例子：我只係影標籤解釋）
大家記住要睇標籤，唔理佢係希臘還是希臘式乳酪，認清楚每100克乳酪，有多於8克嘅蛋白質，而且低於3克嘅脂肪，先至係一個健康嘅低脂希臘式乳酪。
不過要公平講句，脂肪高啲一定滑啲香啲。有啲係稍為高脂肪而蛋白質依然豐富，我都列咗畀大家睇。但想增肌減脂，就最好揀啲低脂肪高蛋白質嘅乳酪啦！其實加埋啲水果一齊食就好好味架啦！
延伸閱讀
